- Mellom øst og vest, Ukraina før og nå

Øyvind Nordsletten, dr. polit. ved Universitetet i Oslo, norsk diplomat og ambassadør, føreles ved Senioruniversitetet i Søgne onsdag 15. februar 2017. Han vil gje ny innsikt og oppdatert kunnskap frå arbeidet i utanrikspolitisk teneste med spesiell vekt på samfunnsutvikling og politikk i Ukraina, på oppgåver og utfordringar, og på samarbeid med Noreg.  Nordsletten har spesiell erfaring som ambassadør, først til Ukraina, deretter i Russland, men også i Irland, og frå 2011- 2013 var han generalkonsul i Murmansk. I 2011 vart han i Oslo tildelt Russlands Vennskapsorden.

Øyvind Nordsletten (f. 1944) har mellom anna gjennomført Forsvarets russiskkurs, han har gjort pliktteneste ved Garnisonen i Sør-Varanger og studert ved universitetet i Oslo. I 1974 gjorde han unna utanriksdepartementet sitt aspirantkurs, og han vart Noregs fyrste ambassadesekretær til Russland frå 1979 til 1982. Frå 1992 til 1996 var Nordsletten Noregs fyrste ambassadør til Kiev (Ukraina).   

    

I kjølvatnet av Treholt-saka vart han erklært uønskt i Sovjetunionen, ei gjengjelding fordi Noreg hadde utvist fleire sovjetiske diplomatar. Men 16 år seinare kom han attende til Russland, utnemnd som ambassadør dit. Denne stillinga hadde han i åtte år (2000- 2008).  Så vart han ambassadør i Dublin, og frå 2011-2013 generalkonsul i Murmansk.

Som diplomat og ambassadør har Nordsletten heile tida lagt stor vekt på samarbeid, personleg kontakt, og på å skape tillit. Til dømes arbeidde han som generalkonsul i Murmansk med å få til normalisering av livet på grensa. Eit anna tema som han der brukte tid og krefter på, var ønsket om å avskaffe visum, og då grensebuaravtalen i 2011 gjorde det mogeleg for innbyggjarane å reise utan visum, meinte Nordsletten det var viktig å avskaffe visum i heile regionen.  

Nordsletten vart i 2000 utnemnd til ambassadør av St. Olavs Orden for embetsforteneste. I 2008 vart han utnemnd til æresmedlem i Norsk-russisk handelskammer for sitt viktige bidrag til betring av norsk-russiske forretningsrelasjonar, og i 2011 vart han æra med å bli tildelt  den russiske Vennskapsordenen. Ambassadør Atle Leikvoll ved EU-delegasjonen har uttalt at ”i  bilateralt samarbeid med Russland er Nordsletten den beste”. 

Møtet med Nordsletten i Senioruniversitetet i 2015 var så engasjerande og spanande at det kom  sterke ønske om ei ny førelesning, denne gongen med Ukraina som spesialtema. 

Kva vil Nordsletten seie om Ukrainas rolle og utvikling i historisk samanheng, i nyare tid, og i dag med Putin som leiar I Russland?  Kva er den største skilnaden mellom før og nå, i levekår for folket, i politikk og i internasjonalt arbeid? Korleis vil han framstille tilhøva for folk flest i Ukraina, og kva meiner han om utviklinga framover? Kva med utdanning, arbeidstilhøve, fridom og tru på framtida? Korleis kan ein best prøve å sikre fred og tryggleik? Korleis påverkar dei nye flyktningstraumane desse utfordringane?  Og korleis kan FN og Nato best medverke?  

I Senioruniversitetet  ser vi fram til ei engasjerande og lærerik førelesing om politisk og økonomisk utvikling i Ukraina, om samarbeid og utfordringar, om forsøk på brubygging og diplomati. Kva har vi lært, og kva bør vi ha lært gjennom historia, og kva bør vera Noregs rolle framover i internasjonalt arbeid og diplomati i desse områda, i Ukraina spesielt, og i (Aust-)Europa generelt? 

Stad: Søgne Gamle Prestegard, Kultursalen

 

Sist oppdatert 13.02.2017 klokken 16:34 av Nicolai Prebensen

Øyvind Nordsletten, dr. polit. ved Universitetet i Oslo, norsk diplomat og ambassadør, føreles ved Senioruniversitetet i Søgne onsdag 15. februar 2017. (Foto: Privat)